ភ្នំពេញៈ ខណៈតារាចម្រៀងស្រីចំណូលថ្មីផលិតកម្មថោន អ្នកនាង យក់ ឋិតរដ្ឋា ទើបតែចាប់ផ្តើមសន្សំពិន្ទុល្អ និងខិតខំកសាងកេរ្តិ៍ឈ្មោះលើវិថីសិល្បៈចម្រៀងសាជាថ្មីមិនទាន់បានប៉ុន្មានផង ក៏ស្រាប់តែលេចចេញរឿងរកាំរកូសចិត្តដ្បិតមានអ្នកឈ្នានីសជាអ្នកសិល្បៈដូចគ្នាច្រណែននឹងភាពល្បីរបស់នាងបាត់ទៅហើយ។
ទោះជាយ៉ាងណា តារាចម្រៀងស្រីអតីតជ្រកនៅទ្រនំហង្សមាសរូបនេះ គ្រាន់តែបង្ហោះសារដ៏វែងអន្លាយមួយរៀបរាប់ប្រាប់ថា កំពុងតែមានអ្នកច្រណែននឹងខ្លួនព្រោះតែនាងនៅមានធម៌មេត្តា និងទុកមុខអ្នកមានចិត្តជាមារតាមយាយីនាងក្នុងរង្វង់សិល្បៈនោះជាមុនសិនដោយមិនទាន់ចង់់វែកមុខពិត។
អ្នកនាង យក់ ឋិតរដ្ឋា ក៏បញ្ជាក់ពីហេតុផលមិនចង់វែកមុខអ្នកឈ្នានីសនាងប្រាប់ភ្នំពេញប៉ុស្តិ៍ឲ្យដឹងដែរថា៖ «ក៏ព្រោះតែនាងគឺខ្ញុំជាមនុស្ស ដែលពុំសូវចូលចិត្តចេះបង្ករឿងតូចឲ្យក្លាយទៅជារឿងធំ និងមិនចង់ឲ្យកើតមានរឿងល្អក់កករផង ទើបគ្រាន់តែសរសេរសារតាមហ្វេសប៊ុកចុះ ប្រសិនបើអ្នកនោះ បានមើលក្រែងគេមានចិត្តចង់កែខ្លួនខ្លះ»។
តារាចម្រៀងដែលជាភរិយារបស់តារាចម្រៀងប្រុសលោក ឃុំ ប៉ុណ្ណាដែត និងជាម្ចាស់ភោជនីយដ្ឋាន Factory-Pub រូបនេះប្រាប់ទៀតថា៖ «វាជារឿងធម្មតាទេ ទោះបីជាស្ថិតនៅក្នុងវិស័យណាក៏ដោយ គឺតែងតែមានមនុស្សចូលចិត្តតាមជ្រៀតជ្រែក ឬឈ្នានីសគេ ក៏ព្រោះតែគេមិនពេញចិត្តយើង ហើយជាការពិតគ្មានមនុស្សណាអាចគាប់ចិត្តមនុស្សបានគ្រប់រូបនោះឡើយ»។
ចំពោះសាររកាំរកូសក្នុងចិត្តដ្បិតមានគេច្រណែននោះ អ្នកនាង យក់ ឋិតរដ្ឋា បានបង្ហោះតាមហ្វេសប៊ុកថា៖ «សូមមនុស្សខ្លះ ដែលតែងតែមើលបំណាំ និងចូលចិត្តពេបជ្រាយខ្ញុំ មើលងាយ និងមិនឲ្យតម្លៃខ្ញុំទាំងឡាយ!មេត្តាគិតផងថា អ្នកដែលកំពុងតែពេបជ្រាយគេនឹងហ្អាក!មានដែលយកកញ្ចក់មកឆ្លុះខ្លួនឯងផងហើយ ឬនៅថាយើងពិតជាល្អគ្រប់ដប់ និងមិនចេះខុសគ្រប់ដប់មែនទេ!និយាយពីគេត្រូវចេះឱនមើលខ្លួនឯងផង ធ្វើខ្លួនឯងឲ្យត្រឹមត្រូវសិនទៅ ចាំមកដៀមដាមនៅមុខគេ មុននឹងពេបជ្រាយឲ្យគេ ច្រណែនគេ ព្រោះឃើញគេមានក្តីសុខ។
មនុស្សអ៊ីចឹងសាហាវហួស នៅមុខផ្សេង ក្រោយខ្នងផ្សេងខ្នងផ្សឹងអ៊ីចឹង។ អូនអត់ខ្វល់ហេ! សំខាន់អូនញ៉ាំបាយផ្ទះអូន!តែចង់ប្រាប់ដែរថា សុំកុំធ្វើចរិតច្រណែនគេ ពេបជ្រាយគេ នេះគ្រាន់តែសរសេរពីចិត្តខ្ញុំឲ្យអ្នកឯងឃើញនោះទេ ហើយខ្ញុំក៏មិនសូវស្លូតដែរ ប្រយ័ត្នលែងទុកមុខឲ្យណាវ៉ើយ»។
តារាចម្រៀងជាចំណូលថ្មីថោន យក់ ឋិតរដ្ឋា ក៏បង្ហោះសារសុំការគាំទ្របន្ថែមថា៖ «ចា!សួស្តី!បងប្អូនទាំងអស់គ្នា!នាពេលខាងមុខនេះ នាងខ្ញុំនឹងមានបទចម្រៀងជាច្រើនចេញលក់លើទីផ្សារជាបន្តបន្ទាប់ពីផលិតកម្មថោន។ ក៏សង្ឃឹមថា អ៊ំៗ ពូៗ មីងៗ បងប្អូនព្រមទាំងប្រិយមិត្តទាំងអស់នៅតែផ្តល់ជាកម្លាំងចិត្ត និងគាំទ្រតារាម្នាក់នេះណាចា!»៕
No comments:
Post a Comment